सुबास बस्नेत
दोलखा, भदौ १
दोलखाको गौरीशंकर गाउँपालिका सुरीमा स्थानीयको लगानीमा निर्माण गरिएको गुरुम्फी जलविद्युत् सहकारीले विगत सात वर्षदेखि सहकारीको हिसाबकिताब सार्वजनिक नगरेको पाइएको छ । सहकारी सञ्चालकले आम्दानी तथा खर्चको विवरण नदेखाई उपभोक्ताको रकममा चरम अनियमितता गरेको स्थानीयको भनाइ छ ।
सहकारीले तत्कालीन समयमा साबिक सुरी गाविसका उपभोक्ताबाट रकम उठाएर २६ दशमलव पाँच किलोवाटको विद्युत् उत्पादन गरेको थियो । सुरीका दुई सय १६ घरपरिवारले प्रतिपरिवार एक सय दिनबराबरको श्रमदान तथा १० देखि १५ हजारसम्म शुल्क उठाएर गुरुम्फी जलविद्युत् आयोजना निर्माण गरी २०६५ सालदेखि बत्ती बाल्न सुरु गरेका थिए ।
स्थानीयले जलविद्युत् उत्पादन गर्न ठूलो आर्थिक लगानी गरे पनि सहकारी सञ्चालकले २०७० सालदेखिको आयव्यय सार्वजनिक गरेका छैनन् । सहकारीले स्थानीयको रकम हिनामिना गरेको भन्दै आयव्यय सार्वजनिक गराउन संघर्ष समिति नै गठन गरेका छन् । उपभोक्तालाई आम्दानी तथा खर्च लुकाएर सार्वजनिक सुनुवाइ नगरी सहकारीको रकममा मनपरी गरेको स्थानीय उपभोक्ता एवं संघर्ष समितिका संयोजक रतिराम श्रेष्ठले बताए । संयोजक श्रेष्ठका अनुसार स्थापनाकालदेखिका सहकारीका अध्यक्ष सूर्यबहादुर खत्रीलगायतको समितिले २०७० सालदेखि सहकारीको साधारणसभा नै गरेको छैन ।
सात वर्षदेखि सहकारीले साधारणसभा नै नगरेका कारण दुई सय जना उपभोक्ताको भेला गरेर २५ जनाको संघर्ष समिति गठन गरेको श्रेष्ठले बताए । समितिले सहकारीको हिसाबकिताब पारदर्शी गर्नुपर्नेसहित सार्वजनिक सुनुवाइको माग गरे पनि सहकारीले कुनै चासो नदेखाएको स्थानीय उपभोक्ता श्यामसुन्दर तामाङले बताए । तामाङका अनुसार स्थानीयलाई नियमित विद्युत् बाल्न दिन भन्दै सहकारीका सञ्चालकले स्थानीय सरकार तथा प्रदेश सरकारबाट अनुदान ल्याए पनि अहिलेसम्म उपभोक्तालाई सहकारीको नाममा आएको अनुदानबारे कुनै जानकारी दिइएको छैन ।
गुरुम्फी जलविद्युत् सहकारीको लागि वाग्मती प्रदेश सरकारले आव २०७४/७५ मा ३० लाख अनुदान पठाएको थियो । त्यसैगरी गाउँपालिकाले १० लाख अनुदान, वडाले तीन लाख अनुदान दिएको थियो भने गाउँपालिकाभित्र रहेको अन्य हाइड्रोपावरबाट १० लाख अनुदान आएको थियो । भूकम्पपछि थप भएका नयाँ भूकम्पपीडित ८८ घरपरिवारबाट सहकारीलाई करिब आठ लाख रकम प्राप्त भए पनि अहिलेसम्म सहकारीले कुनै पनि रकमको सार्वजनिक सुनुवाइ र अडिट नगरेको तामाङले बताए ।
संघर्ष समितिले १० दिनभित्र सहकारीलाई आम्दानी तथा खर्चको विवरण गर्न निवेदन दिएकोमा सहकारीले भदौ १५ पछि यस विषयमा छलफल गर्ने पत्र पठाएको संघर्ष समितिका संयोजक श्रेष्ठले बताए । उक्त जलविद्युत् आयोजना विगत एक वर्षदेखि बन्द छ । स्थानीयको लाखौं लगानीमा निर्माण गरिएको जलविद्युत् आयोजना एक वर्षदेखि बन्द रहँदा पनि सहकारीले पुनः सुचारु गर्न कुनै चासो नदिएको स्थानीयले बताएका छन् ।
क्याटेगोरी : नेपाल
ताजा अपडेट
- आगामी दुई दिन गर्मी बढ्ने, सावधानी अपनाउन आग्रह
- कांग्रेस संसदीय दलको बैठक बस्दै
- कांग्रेसको अवरोधपछि प्रतिनिधि सभा बैठक स्थगन
- कांग्रेसको अवरोधपछि राष्ट्रियसभा बैठक स्थगन
- सगरमाथा आधार शिविरतर्फ पठाइयो ‘विश्व शान्ति दीप’
- तीन विदेशी महिला दुई केजी छ सय ५४ ग्राम लागुऔषधसहित पक्राउ
- विकासलाई अगाडि बढाउन राष्ट्रिय शक्तिलाई निर्णायक तहमा पुर्याउनुपर्छ: अध्यक्ष ओली
- आन्दोलनरत आम सम्पर्क मञ्च र भन्सा कार्यालय बिच बार्ता
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- चिया पसल पनि कम्पनी ?
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया