काठमाडौं । नेपालको आर्थिक समृद्धि एवम् नेपाली वस्तु निर्यात तथा पर्यटन प्रवर्द्धनका लागि नेपाल र अमेरिकाबीचको व्यापार वृद्धिमा जोड दिइएको छ । नेपाली महावाणिज्यदूतावास न्यूयोर्कले गैरआवासीय नेपाली संघ, अमेरिका, न्यूयोर्क च्याप्टरसँगको सहकार्य र स्थानीय नेपाली उद्यमी, व्यवसायी तथा संघ/संस्थालगायतको सहभागितामा न्यूयोर्कमा आयोजित ‘नेपाली उत्पादन, मौलिक परिकार तथा पर्यटन प्रवर्द्धनमा गैरआवासीय नेपाली समुदाय/व्यवसायीको भूमिका’ विषयक अन्तर्क्रिया कार्यक्रममा सहभागीहरुले उक्त कुरामा जोड दिएका हुन् ।
कार्यक्रममा कार्यवाहक महावाणिज्यदूत विष्णु गौतमले नेपाल र अमेरिकाबीचको व्यापार, पर्यटन, शैक्षिक तथा सांस्कृतिक आदानप्रदान अझ वृद्धि गर्न नेपाली व्यवसायी, शैक्षिक संस्था, नेपालका मित्र अमेरिकी नागरिक, पर्यटक, तथा गैरआवासीय नेपाली समुदायको सञ्जाल निकै प्रभावकारी हुनसक्ने बताए । विदेशमा रहेका नेपाली समुदायले हासिल गरेको ज्ञान, सीप पुँजी, एवम् प्रविधिबाट नेपालले अझ बढी लाभ लिन सबैको प्रयास आवश्यक हुने उनको भनाइ थियो । उनले नेपाल र अमेरिकाबीचको व्यापारमा दुवै देशलाई लाभ हुने गरी उच्च वृद्धि सम्भव रहेको र यसका लागि थप बजारीकरण जरुरी रहेको बताए । दुईपक्षीय व्यापारको अवस्था, अमेरिका निर्यात भइरहेका र उच्च सम्भावना भएका नेपाली वस्तु र ती वस्तुले अमेरिकी बजार प्रवेशमा पाउने सुविधाबारे पनि जानकारी दिएका थिए । अमेरिकामा नेपाली परिकार र पर्यटन प्रवर्द्धनमा संलग्न व्यवसायीले खेलेको भूमिकाको प्रशंसा गर्दै उनले बढ्दो नेपाली समुदाय र विस्तारित सञ्जालबाट संख्यात्मक र गुणात्मक दुवै रुपमा नेपालको प्रवर्द्धनमा अझ बढी योगदानका लागि नेपाली समुदायलाई आग्रह गरे ।
यस्तै नेपाल र अमेरिकाबीच रहेको मैत्रीपूर्ण र सुमधुर कूटनीतिक सम्बन्धलाई अझ प्रगाढ पार्न जनस्तर र व्यवसायस्तरका सम्बन्धको महत्वपूर्ण भूमिका हुने उनको भनाइ थियो । कार्यक्रममा अमेरिकामा विभिन्न नेपाली वस्तुको आयात, बजारीकरण, बिक्रीवितरण तथा पर्यटन र परिकार प्रवर्द्धनमा सक्रिय सर्वश्री अनिल रौनियार, लिंकन एभरेष्ट, सुमित अग्रवाल, निश्चल बाँस्कोटा, दुर्गेशजंग कार्की, मनीष कर्ण र साङ्गदोर्जे शेर्पा गरी सात जना व्यवसायीद्वारा प्रस्तुतीकरण गरिएको थियो । प्रस्तुतीकरणमा नेपालको प्रवर्द्धनका लागि आ–आफ्ना तर्फबाट भइरहेका प्रयास, अवसर र चुनौती तथा नेपालमा स्थानीयस्तरमा उत्पादित वस्तुदेखि अन्य वस्तु निर्यातसञ्जालमा जोड्न, जीएसपी नवीकरण, भन्सार सुविधा, बजारीकरण र नेपाली वस्तुको गुणस्तर कायम राख्न नेपाल सरकारको सहयोग आवश्यक रहेको धारणा व्यवसायीले राखेका थिए ।
कार्यक्रममा एनआरएनए– न्यूयोर्क च्याप्टरका उपाध्यक्ष शोभाकान्त पाण्डेले नेपाल सरकारले देशको आर्थिक समृद्धिका लागि एवम् नेपाली वस्तु निर्यात तथा पर्यटन प्रवर्द्धनका लागि चालेका कदममा गैरआवासीय नेपाली समुदायको साथ र सहयोग रहने प्रतिबद्धता जनाए । कार्यक्रममा आमन्त्रित अतिथिका लागि नेपाली परिकारसहितको दिवाभोजको व्यवस्था गरिएको थियो ।
क्याटेगोरी : नेपाल
ताजा अपडेट
- फिनल्याण्डद्वारा जलवायु अनुकूलन कार्यक्रमका लागि एक अर्ब ८७ करोड अनुदान
- बजार परिसुचक २१ सय १५ बिन्दुमा
- मधेस प्रदेशमा दुई लाख ५१ हजार परिवारले स्वास्थ्य बीमा गराए
- कान्तिलोकपथ एक हप्ताभित्र सञ्चालन गरिने
- हेलिकोप्टर दुर्घटनामा इरानी राष्ट्रपति रायसीसहित नौ जनाको मृत्यु
- सरावल गाउँपालिकाको भौतिक प्रगति ८० प्रतिशत
- राजनीतिक दलसम्बन्धी विधेयक प्रतिनिधिसभाबाट फिर्ता
- दुहवी र इटहरीका आगलागी पीडित घरपरिवारलाई राहत वितरण
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- चिया पसल पनि कम्पनी ?
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया