सोलुका ग्रामीण भेगका महिलाहरूका लागि घर धान्ने गतिलो स्रोत बन्दै निगुरो

सोलुखुम्बु । जंगलमा पाइने निगुरो सोलुखुम्बुका ग्रामीण भेगका महिलाका लागि घर धान्ने गतिलो स्रोत बन्न थालेको छ । जंगल तथा खोलाखाल्सीमा आफैँ उम्रिएको निगुरो बिक्रीबाट गृहिणीहरूले घरखर्चदेखि बालबालिकाको पढाइखर्च समेत धानिरहेका छन् ।

निगुरो बिक्रीबाट आएको आम्दानीले घरखर्च देखि बालबालिकाको पढाइखर्च समेत धान्ने गरेको माप्यदुधकोशी गाउँपालिका ५ काँकुकी ङिमा शेर्पाले बताइन् । फुर्सदको समय तथा गाईवस्तु चराउन जाँदा संकलन गर्ने निगुरो जिल्लाको विभिन्न स्थानमा लाग्ने साप्ताहिक हाट सम्म लगेर बिक्री गर्ने गरेका छन् । न्यून आय स्रोत भएकाहरूलाई वर्षामा उत्पादन हुने निगुरो बरदान नै सावित भएको छ । चारकोशे झाडीभित्र पाइने निगुरोको साग बेचेर धेरैले घरखर्च चलाउँदै आएका छन् ।

बिहान–बेलुकाको घरधन्दाबाट बचेको समय निगुरो टिपेर बेच्दा बालबच्चाको भरणपोषण र घरखर्च समेत चलाउन सजह भएको जोगराकी रिताकला सुनुवारको भनाइ छ । गाउँघरमै खपत हुनेगरेको निगुरो पछिल्लो समय क्रेताको रोजाइमा समेत पर्न थालेको छ । सोलुखुम्बुका धेरै गृहिणीदेखि बालबालिकाले समेत दैनिक खर्च जुटाउन यसरी नै निगुरो बेच्ने गरेका छन् । जंगलमा यतिकै खेर जाने वनस्पति निगुरोलाई आर्थिक आम्दानीसँग जोड्दा घरखर्च चलाउन सजिलो भएको छ ।