चिल्ड्रेन भिजनद्वारा बालबालिकालाई न्यानो कपडा वितरण

काठमाडौं । बालबालिकाको क्षेत्रमा काम गर्दै आएको चिल्ड्रेन भिजन नेपालले काठमाडौंको शंखरापुर नगरपालिका वडा नम्बर १ र २ का विपन्न परिवारका स्कुले बालबालिकाहरुको लागि न्यानो कपडा वितरण गरेको छ ।

चिसो समयमा पातलो कपडा लगाएर विद्यालय जान बाध्य बालबालिकाहरुलाई चिसोबाट लाग्ने विभिन्न रोगहरुबाट बचाउने उद्देश्यले न्यानो कपडा वितरण गरिएको चिल्ड्रेन भिजनले जनाएको छ । ‘हामीले निःशुल्क वितरण गरेको कपडाले तातो दिनुको साथै बालबालिकालाई निमोनिया, रुघाखोकी जस्ता रोग लाग्नबाट पनि बचाउने भएकाले ट्र्याकसुट वितरण गरिएको हो’, चिल्ड्रेन भिजनका अध्यक्ष रमेश सिलवालले भने, ‘बालबालिकाको क्षेत्रमा संस्थाले विगतदेखि नै सहयोग गर्दै आएको छ र आगामी दिनमा पनि यस्ता कार्यक्रमलाई निरन्तरता दिने योजना छ ।’

चिल्ड्रेन भिजनले हरेक वर्षको चिसो मौसममा विभिन्न क्षेत्रका बालबालिकाहरुलाई न्यानो कपडा वितरण गर्दै आएको छ । संस्थाले गत वर्ष आर्थिक रुपमा विभिन्न, दलित परिवारका बालबालिकाहरुलाई न्यानो कपडा वितरण गरेको थियो । कपड वितरण कार्यक्रममा स्थानीयले संस्थालाई धन्यवाद दिँदै यस्ता कार्यक्रमलाई निरन्तरता दिन आग्रह गरेका थिए ।