वीरेन्द्रनगर नगरपालिकाले भूकम्प प्रभावितलाई रु. २६ लाख दिने

भेरीगङ्गा (सुर्खेत) । जाजरकोटका भूकम्पपीडितलाई सुर्खेतको वीरेन्द्रनगर नगरपालिकाले राहतस्वरुप रु. २६ लाख रकम सहयोग गर्ने भएको छ । कर्णाली प्रदेशको राजधानी समेत रहेको वीरेन्द्रनगर नगरपालिकाले रु. २६ लाख रकम सहयोग गर्ने निर्णय गरेको हो ।

नगरप्रमुख मोहनमाया ढकालले मङ्गलबार बसेको नगर कार्यपालिकाको बैठकले १६ वटै वडाको वडा विपद् कोषबाट रु. एक-एक लाख १६ लाख र नगरपालिकाकोतर्फबाट रु. १० लाख गरी जम्मा २६ लाख सहयोग गर्ने निर्णय गरेको जानकारी दिए ।

भूकम्पपीडित परिवारका बालबालिका वीरेन्द्रनगरको सामुदायिक विद्यालयमा अध्यनरत भएकालाई र नगरपालिकाभित्र अध्ययन गर्न चाहनेका लागि नगरपालिकाले नगर शिक्षा विकास कोषमार्फत निःशुल्क अध्ययन व्यवस्थापन गर्ने भएको छ ।

गाउँपालिका अध्यक्ष सुन्दरकुमार केसीले दैलेखको डुङ्गेश्वर गाउँपालिकाले पनि भूकम्पपीडितलाई रु. ५० हजार सहयोग गर्ने बताएको जानकारी दिए ।