सरकारी खातामा तीन खर्ब ३३ अर्ब नगद मौज्दात

काठमाडौं । सरकारी खातामा तीन खर्ब ३३ अर्ब आठ करोड रुपैंयाँ नगद मौज्दात देखिएको छ । महालेखा नियन्त्रकको कार्यालयले दिएको जानकारीअनुसार चालू आर्थिक वर्षको चैत मसान्तसम्ममा नेपाल राष्ट्र बैंकमा रहेका सरकारका विभिन्न खाताहरुमा उक्त परिमाणमा नगद मौज्दात देखिएको हो । यो रकममा प्रदेश सरकार तथा स्थानीय तहको खातामा रहेको रकम समेत समावेश रहेको महालेखाको भनाइ छ । २०७८ असार मसान्तमा भने यस्तो मौज्दात दुई खर्ब १८ करोड रुपैयाँ थियो ।

चालू आर्थिक वर्ष २०७८/०७९ को चैत मसान्तसम्ममा संघीय सरकारको कुल खर्च रकम भने सात खर्ब ९४ अर्ब २४ करोड रुपैयाँ छ । यस अवधिमा चालू खर्चतर्फ छ खर्ब २५ अर्ब ५० करोड, पुँजीगत खर्चतर्फ एक खर्ब तीन अर्ब ७९ करोड र वित्तीय व्यवस्थाअन्तर्गतको खर्चतर्फ ६४ अर्ब ९७ करोड रुपैयाँ रहेको महालेखाको भनाइ छ ।

समीक्षा अवधिमा संघीय सरकारको कुल राजस्व सात खर्ब ८९ अर्ब २६ करोड परिचालन भएको छ । यसमा प्रदेश सरकार तथा स्थानीय तहमा बाँडफाँट हुने रकम समेत समावेश छ । यसमध्ये कर राजस्वतर्फ सात खर्ब २७ अर्ब ७९ करोड र गैरकर राजस्वतर्फ ६१ अर्ब ४७ करोड परिचालन भएको महालेखाले जनाएको छ ।

संघीय सरकारले चालू आर्थिक वर्षको पछिल्लो नौ महिनामा ट्रेजरी बिलमार्फत ५० अर्ब, विकास ऋणपत्रमार्फत ५४ अर्ब ५० करोड र नागरिक बचतपत्रमार्फत ९७ करोड परिचालन गरी जम्मा एक खर्ब पाँच अर्ब ४७ करोड आन्तरिक ऋण परिचालन गरेको छ । समीक्षा अवधिमा प्रदेश सरकारको स्रोत प्राप्ति एक खर्ब २५ अर्ब ५३ करोड रहेको छ ।

यसमध्ये संघीय सरकारले प्रदेश सरकारलाई हस्तान्तरण गरेको अनुदान र विभाज्य कोषबाट बाँडफाँट हुने राजस्व समेत गरी ९० अर्ब चार करोड छ र प्रदेश सरकारहरुले परिचालन गरेको राजस्व र अन्य स्रोतबाट ३५ अर्ब ४८ करोड रहेको छ । यसैगरी, यस अवधिमा प्रदेश सरकारहरुको खर्च ८० अर्ब ६२ करोड रुपैयाँ रहेको महालेखाले जानकारी दिएको छ ।