भीमेश्वर बहुउद्देश्यीय सहकारीको नाफा ६५ लाख

दोलखा । भीमेश्वर बहुउद्देश्यीय सहकारी संस्थाले ६५ लाख ५६ हजार रुपैयाँ खुद नाफा कमाएको छ । जिल्लाको तामाकोशी गाउँपालिका–१ भिरकोटमा रहेको सहकारीले आर्थिक वर्ष २०७९/८० मा उक्त नाफा कमाएको हो ।

यस्तै संस्थाले कुल ४४ करोड ३४ लाख ५३ हजार पुँजी संकलन गर्न सफल भएको छ । संस्थाको २८औं स्थापना दिवसको अवसरमा बुधबार आयोजित कार्यक्रममा संस्थाका कोषाध्यक्ष यज्ञबहादुर श्रेष्ठले आर्थिक प्रतिवेदन प्रस्तुत गर्दै सो जानकारी दिएका हुन् । उनका अनुसार संस्थाले आर्थिक वर्ष २०७९/८० सम्म आइपुग्दा तीन करोड २६ लाख ३४ हजार रुपैयाँ सेयर जम्मा गरेको छ । त्यस्तै जगेडा तथा अन्य कोषतर्फ दुई करोड ९२ लाख रुपैयाँ, बचत निक्षेपतर्फ ३४ करोड ६६ लाख २५ हजार रुपैयाँ र स्थिर सम्पत्तितर्फ दुई करोड ७९ लाख ४३ हजार रुपैयाँबराबरको सम्पत्ति संकलन गरेको छ । संस्थाका अध्यक्ष सिताराम उप्रेतीको अध्यक्षता तथा एकीकृत समाजवादीका नेता शिवप्रसाद भण्डारीको प्रमुख आतिथ्यतामा सम्पन्न सो कार्यक्रममा संस्थाले विभिन्न विधामा संस्थापक सेयर सदस्य, पूर्वसञ्चालक, उत्कृष्ट विद्यार्थी तथा उत्कृष्ट सेयर सदस्य र कर्मचारीलाई सम्मान समेत गरेको छ ।

यस्तै सहकारीले दाना उद्योग समेत सञ्चालनमा लाएर उत्पादन थालेको जनाएको छ । संस्थामा हाल तामाकोशी गाउँपालिका तथा छिमेकीपालिकाका गरी सात हजार एक सय ७३ जना सेयर सदस्य आबद्ध छन् ।