इन्डोनेसिया भूकम्पमा मृत्यु हुने संख्या २६८ पुग्यो, १५१ अझै बेपत्ता

बाली । पश्चिमी इन्डोनेसियामा सोमबार गएको भूकम्पमा परी मृत्यु हुनेको संख्या दुई सय ६८ पुगेको छ भने एक सय ५१ जना अझै बेपत्ता रहेको स्थानीय अधिकारीले मंगलबार बताएका छन् ।

राष्ट्रिय विपद् व्यवस्थापन एजेन्सीका प्रमुख सुहर्यान्तोले पत्रकार सम्मेलनमा बताएअनुसार मृत्यु हुनेको संख्या दुई सय ६८ पुगेको छ । सोमबार इन्डोनेसियाको पश्चिम जाभा प्रान्तमा गएको ५.६ म्याग्निच्युडको भूकम्पमा एक हजार ८३ जना घाइते भएका र ५८ हजार तीन सय ६२ जनालाई घरबाट भाग्न बाध्य बनाएको थियो । भूकम्पले २१ हजारभन्दा बढी घर र पूर्वाधारमा क्षति पुगेको बताइएको छ । भूकम्पपीडितको खोजी तथा उद्धार कार्य अझै जारी रहेको सुहर्यान्तोले बताएका छन् ।

यसअघि मंगलबार इन्डोनेसियाका राष्ट्रपति जोको विडोडोले अधिकारीहरूलाई उद्धारकार्यलाई तीव्रता दिन र प्राथमिकता दिन र पीडितको उद्धार गर्न आग्रह गरेका थिए ।

भूकम्पबाट क्षति भएका घरलाई सरकारले करिब एक करोड रुपैयाँदेखि पाँच करोड रुपैयाँसम्मको क्षतिपूर्ति दिने घोषणा गरेको छ । राष्ट्रपतिले भूकम्प प्रभावित क्षेत्रको भ्रमणका क्रममा सो घोषणा गरेका हुन् । विडोडोले निर्माण गर्नुपर्ने नयाँ घर भूकम्प प्रतिरोधी हुनुपर्नेमा जोड दिएका छन् ।

सोमबार जकार्ता समय १३ः२१ मा गएको भूकम्पको केन्द्रविन्दु पश्चिमी जाभा प्रान्तको सिआनजुर जिल्लाको १० किलोमिटर दक्षिणपश्चिममा र १० किलोमिटर गहिराइमा रहेको मौसम विज्ञान, मौसम विज्ञान र भूभौतिक निकायले जनाएको छ।