राष्ट्र बैंकको आन्तरिक ऋण असुली प्रक्रिया

काठमाडौं ।
नेपाल राष्ट्र बैंकले जेठ १६ गते अर्थात् आज सोमबार पुनः २६ अर्ब १३ करोड रुपैयाँबराबरको ट्रेजरी बिक्री गर्ने भएको छ । राष्ट्र बैंकका अनुसार आज अपराह्न ३ बजेसम्म उक्त परिमाणमा ट्रेजरी बिल बिक्री गर्न लागिएको हो । यसअघि अर्थात् जेठ १० गते पनि राष्ट्र बैंकले २७ अर्ब २० करोड ३२ लाख रुपैयाँबराबरको ट्रेजरी बिक्री गरेको थियो ।

राष्ट्र बैंकका अनुसार जारी मिति जेठ १८ गते मंगलबार तोकिएको ट्रेजरी खरिदको लागि वाणिज्य बैंक, विकास बैंक र फाइनान्स कम्पनीहरुले भाग लिन सक्नेछन् । बिक्री गरिने कुल ट्रेजरीमध्ये पुरानो नवीकरणअन्तर्गत ९१ दिने अवधिको तीन अर्ब १३ करोड र तीन सय ६४ दिने अवधिको १२ अर्ब रुपैयाँ समेत गरी कुल १५ अर्ब १३ करोड रुपैयाँ रहेको छ ।

नयाँ अर्थात् फ्रेसतर्फ भने ९१ दिने अवधिको पाँच अर्ब र एक सय ८२ दिने अवधिको छ अर्ब समेत गरी कुल ११ अर्ब रुपैयाँको रहेको छ । यसअन्तर्गत राष्ट्र बैंकले ९१ दिने अवधिको कुल आठ अर्ब १३ करोड, एक सय ८२ दिने अवधिको छ अर्ब र तीन सय ६४ दिने अवधिको १२ अर्ब समेत गरी कुल २६ अर्ब १३ करोड रुपैयाँ बराबरको ट्रेजरी बिक्री गर्नेछ ।

बिक्री गरिने यी ट्रेजरीहरुको परिपक्व हुने अवधि भने क्रमशः २०७८ भदौ १५ गते, २०७८ मंसिर १४ गते र २०७९ जेठ १७ गते तोकिएको छ । यसअघि अर्र्थात् गत साता पनि राष्ट्र बैंकले २८ दिने अवधिको पाँच अर्ब, ९१ दिने अवधिको दुई अर्ब २३ करोड ३२ लाख, एक सय ८२ दिने अवधिको १२ अर्ब ४७ करोड र तीन सय ६४ दिने अवधिको सात अर्ब ५० करोड रुपैयाँबराबरको ट्रेजरी बिल बिक्री गरेको थियो ।

राष्ट्र बैंकका अनुसार सोमध्ये २८ दिने अवधिको पाँच अर्ब रुपैयाँको ट्रेजरीको लागि सात अर्ब ३० करोड, ९१ दिने दुई अर्ब २३ करोड ३२ लाख रुपैयाँको ट्रेजरीको लागि छ अर्ब ९७ करोड ५० लाख, एक सय ८२ दिने अवधिको १२ अर्ब ४७ करोड रुपैयाँबराबरको ट्रेजरीको लागि १८ अर्ब ३७ करोड र तीन सय ६४ दिने अवधिको सात अर्ब ५० करोड रुपैयाँको ट्रेजरीको लागि २० अर्ब ५७ करोड रुपैयाँबराबरको आवेदन परेको थियो ।

राष्ट्र बैंकले चालू आर्थिक वर्षभित्र दुई खर्ब २५ अर्ब रुपैयाँबराबरको आन्तरिक ऋण लक्ष्य लिएको छ । सोअनुसार चालू आर्थिक वर्षको पहिलो चौमासिकमा ५७ अर्ब रुपैयाँको आन्तरिक ऋण उठाइसकेको राष्ट्र बैंकले चालू आवको दोस्रो चौमासिकमा पनि ५६ अर्ब रुपैयाँको आन्तरिक ऋण उठाएको छ । ट्रेजरी बिल, विकास ऋणपत्र, नागरिक बचतपत्र र वैदेशिक रोजगार बचतपत्रसहितका मौद्रिक उपकरणहरु बिक्री गरेर उक्त परिमाणमा ऋण उठाइएको राष्ट्र बैंकले जानकारी दिएको छ ।

यसैगरी चालू आवको तेस्रो चौमासिकमा भने राष्ट्र बैंकले एक खर्ब १२ अर्ब रुपैयाँबराबरको आन्तरिक ऋण उठाउनेछ  । यसको लागि राष्ट्र बैंकले ६९ अर्ब ५० करोड रुपैयाँबराबरको ट्रेजरी बिल, ४० अर्ब रुपैयाँबराबरको विकास ऋणपत्र दुुई अर्ब रुपैयाँबराबरको नागरिक बचतपत्र र ५० करोड रुपैयाँबराबरको वैदेशिक रोजगार बचतपत्र बिक्री गर्ने तयारी गरेको छ ।