दार्चुला हिम पहिरोमा तीन जनाको शव भेटियो

दार्चुला । मङ्गलबारदेखि हिमपहिरोमा परी सम्पर्कबिहीन रहेका यार्सा सङ्कलकमध्ये सात जनाको सशस्त्र प्रहरीले उद्धार गरेको थियो भने पाँच जना सम्पर्कविहीन रहेका थिए । बुधबार सम्पर्कविहीन पाँच जनामध्ये दुई महिला र एक पुरुषको शव फेला पारेको प्रहरीले जानकारी दिएको छ ।

सशस्त्र प्रहरी बल ५० नम्बर गुल्मका गुल्मपति सशस्त्र प्रहरी नायब उपरीक्षक ईश्वरीदत्त भट्टले बेपत्ता भएको ठाउँबाट करिब अढाइ किलोमिटर तल हिउँभन्दा बाहिर मृतावस्थामा तीन शव भेटिएको जानकारी दिए । उनले भने शव भेटिए पनि पहिचान भने खुलिसकेको छैन् ।

मंङ्गलबार दिउँसोबाट सशस्त्रको टोली उद्धार तथा खोजीमा खटिएको भए पनि लगातारको हिमपात र वर्षाका कारण कठिनाइ भइरहेको उनले बताए । बुधबार पनि बिहानदेखि टोली खटिएको छ ।