महिला हिंसाका घटना दैनिक बढ्दै

दोलखा ।
जिल्लामा पछिल्लो समय महिला हिंसाको घटना बढ्दै गएको पाइएको छ । दोलखामा चालू आर्थिक वर्षको छ महिनाको अवधिमा एक सय ९० वटा महिला हिंसाका घटना भएका छन् । पुस मसान्तसम्ममा महिला हिंसाअन्तर्गतका सम्बन्धविच्छेद, आत्महत्या, बलात्कार, घरेलु हिंसालगायत एक सय ९० वटा उजुरी जिल्ला अदालत दोलखामा परेका छन् ।

यस्तै पछिल्लो छ महिनाको अवधिमा ९० जना महिलाले हिंसाका कारण सम्बन्धविच्छेद गरेका छन् । राष्ट्रिय महिला आयोगले बिहीबार दोलखाको भीमेश्वर नगरपालिकामा आयोजना गरेको महिला हिंसासम्बन्धी अन्तरक्रिया कार्यक्रममा जिल्ला अदालत दोलखाका श्रेस्तेदार सुमनकुमार कुशवाहाले अदालतमा दर्ता भएका धेरैजसो मुद्दाहरू सम्बन्धविच्छेदका रहेको जानकारी दिए ।

कार्यक्रममा उनले अत्यधिक मात्रामा सम्बन्धविच्छेदका घटना वृद्धि हुँदै गएको बताए । जिल्ला प्रशासन कार्यालय दोलखाका सहायक प्रमुख जिल्ला अधिकारी बद्रीप्रसाद तिवारीले दोलखामा महिला हिंसाका घटना न्यूनीकरण गर्न अपनाउनुपर्ने उपायका सम्बन्धमा कार्यक्रमको सहजीकरण गरेका थिए । तिवारीले दोलखामा हुनेगरेका लिभिङ टुगेदर, वैदेशिक रोजगार जाँदा हुने घटना तथा घरेलु महिला हिंसा, बलात्कारलगायतका घटना न्यूनीकरण गर्न सम्बन्धित निकायले खेल्नुपर्ने भूमिकालगायत रोक्ने उपायको सम्बन्धमा सहभागी महिलाहरूलाई जानकारी गराएका थिए ।

त्यसैगरी कार्यक्रममा जिल्ला प्रहरी कार्यालय दोलखाका प्रहरी प्रमुख डीएसपी भेषराज रिजालले लिभिङ टुगेदारका घटना दोलखामा खासै नदेखिए पनि विवाहपछि सम्बन्धविच्छेद, जबर्जस्ती करणी, बालिका बलात्कार र घरेलु महिला हिंसाका घटनाका उजुरी धेरै आउने गरेको बताए । यसलाई रोक्नका लागि सबै निकायले गाउँसम्म महिला हिंसा न्यूनीकरणका कार्यक्रम लिएर जानुपर्ने बताए ।

त्यसैगरी मेलुङ गाउँपालिकाकी उपाध्यक्ष एवं मेलुङ न्यायिक समितिकी संयोजक कल्पना भण्डारीले गाउँपालिकामा आउने धेरै उजुरीमध्ये घरेलु महिला हिंसा, प्रेम सम्बन्धपछिको आत्महत्या, बालिका बलात्कार किशोरी बलात्कार, सम्बन्धविच्छेद र शारीरिक सम्बन्धलगायतका उजुरी आउने गरेको बताइन् । कार्यक्रममा जिल्लाका ६५ जना महिला सहभागीले भएका थिए । सहभागी अपाङ्गता भएका महिलाहरूले अपाङ्ग भएकै कारण धेरै हिंसा सहेर बस्नुपरेको पीडा महिला अधिकारकर्मीसामु राखेका थिए ।