स्ट्यान्डर्ड चार्टर्डद्वारा ओपन नलेज नेपाललाई ३० लाख रुपैयाँ प्रदान

काठमाडौं । स्ट्यान्डर्ड चार्टर्ड बैंक नेपालले ओपन नलेज नेपालका किशोरी प्रोजेक्टलाई सहयोगार्थ ३० दशमलव ३६ लाख रुपैयाँ (यूएस डलर २५,०००) सहयोग प्रदान गरेको छ । किशोरी प्रोजेक्टले किशोरावस्थाका युवतीहरूलाई आधारभूत, वित्तीय, डिजिटल र जीवनोपयोगी सीपहरूबाट प्रोत्साहित, सशक्त एवं सुसज्जित गर्ने लक्ष्य राखेको छ । परियोजना सातवटै प्रदेशहरूका १० सामुदायिक कलेजहरूमा एक सयभन्दा बढी उच्च शिक्षा अध्ययन गरिरहेका युवतीहरूका लागि लक्षित रहनेछ र यसको कार्यान्वयन पक्षमा सेक्वेल फाउन्डेसनले जिम्मा लिएको छ । यो परियोजना बृहत् आर्थिक समावेशीकरणलाई प्रवर्द्धन गर्दै असमानताको सम्बोधनका लागि बैंकको विश्वव्यापी पहल ‘फ्युचर्स मेकर्स बाई स्ट्यान्डर्ड चार्टर्ड’सँग मिल्दोजुल्दो छ ।

सहायता रकम बैंकका कर्पोरेट अफेयर्स, ब्रान्ड एन्ड मार्केटिङ प्रमुख सुश्री प्रनु सिंहद्वारा ओपन नलेज नेपालका सीईओ निकेश बलामीलाई हस्तान्तरण गरिएको थियो । रकम हस्तान्तरण समारोहलाई सम्बोधन गर्दै उनले भने, ‘विभिन्न सीपहरू सिकाउने र समाजमा आवश्यक प्रगति एवं परिवर्तन ल्याउन सहयोग गर्ने लक्ष्य लिएको ओकेएनसँग सहकार्य गर्न पाउँदा बैंक हर्षित भएको छ ।’