२१ अर्ब १० करोड रुपैयाँको ट्रेजरी बिल जारी

काठमाडौं । नेपाल राष्ट्र बैंकले माघ १६ गते अर्थात् सोमबार पुनः २१ अर्ब १० करोड रुपैयाँबराबरको ट्रेजरी बिल जारी गरेको छ । राष्ट्र बैंकका अनुसार सो दिन अपराह्न २ बजेसम्म उक्त परिमाणमा ट्रेजरी बिल बिक्री गरिएको हो । यसअघि यही माघ १० गते पनि राष्ट्र बैंकले तीन अर्ब ६० करोड रुपैयाँ बराबरको ट्रेजरी बिल बिक्री गरेको थियो ।

राष्ट्र बैंकका अनुसार जारी मिति माघ १७ गते मंगलबार तोकिएको ट्रेजरी खरिदको लागि वाणिज्य बैंक, विकास बैंक र फाइनान्स कम्पनीहरुले भाग लिन पाउनेछन् । बिक्री गरिएको उक्त ट्रेजरीहरु क्रमशः २८ दिने अवधिको पाँच अर्ब, ९१ दिने अवधिको पाँच अर्ब १० करोड, एक सय ८२ दिने अवधिको पाँच अर्ब र तीन सय ६४ दिने अवधिको छ अर्ब रुपैयाँबराबरको रहेको छ । जसमध्ये २८ दिनेको २०७९ फागुन १६ गते, ९१ दिनेको २०८० वैशाख १९ गते, एक सय ८२ दिने अवधिको २०८० साउन १६ गते र तीन सय ६४ दिने अवधिको २०८० माघ १६ गते परिपक्व हुने अवधि तोकिएको छ । राष्ट्र बैंकका अनुसार सो दिन बिक्री भएको उक्त ट्रेजरीमा छ अर्ब रुपैयाँबराबरको नयाँ रहेको छ भने बाँकी पुरानो नवीकरणअन्तर्गतको छ ।