वर्तमान सरकारले चाँडै विश्वासको मत लिन्छ : मुख्यमन्त्री थापा

मोरङ । गठबन्धन दलहरुबीच सहमति कायम गरी चाँडै वर्तमान सरकारले विश्वासको मत लिने कोशी प्रदेशका मुख्यमन्त्री उद्धव थापाले बताएका छन् । उनले सञ्चारकर्मीसँग कुरा गर्दै भदौ १ गतेदेखि प्रदेश सभाको बैठक सुरु हुँदा उपयुक्त समयमा वर्तमान सरकारले विश्वास मत लिने प्रष्ट पारे ।

विश्वासको मतपछि गठबन्धन दलहरुबाट थप मन्त्री नियुक्त गरिने मुख्य मन्त्री थापाले जानकारी दिनुका साथै विगतको सरकारले अध्यादेशमार्फत ल्याएको बजेट सदनमा रोकिएमा प्रतिपक्षसँग सहमति कायम गरी पास गराउने बताए ।

पहिचानवादीसँग वार्ताका लागि सरकारले चाँडै वार्ता टोली गठन गरी संवाद प्रारम्भ गरिने जानकारी दिँदै उनले वार्ताकै माध्यमबाट निस्केको निष्कर्षको परिणामलाई सार्थक बनाइने प्रष्ट पारे ।