भारतमा कोरोना भाइरसबाट एकै दिनमा चार सय ५९ जनाको मृत्यु

नयाँ दिल्ली ।
भारतमा कोरोना भाइरस संक्रमणबाट एकै दिनमा चार सय ५९ जनाको मृत्यु भएको छ । एकै दिनमा कोरोनाबाट चार सय ५९ जनाको मृत्यु हुनु यसवर्ष सुरु भएयताको नै सबैभन्दा धेरै संख्या भएको केन्द्रीय स्वास्थ्य तथा परिवार कल्याण मन्त्रालयले बिहीबार जानकारी दिएको छ ।

बुधबार कोरोनाबाट चार सय ५९ जनाको मृत्यु भएपछि यहाँ यस प्रकोपको कारण ज्यान गुमाउनेको संख्या एक लाख ६२ हजार नौ सय २७ जना पुगेको उक्त मन्त्रालयले जनाएको छ । गत जनवरीमा कोरोना संक्रमितको दैनिक संख्या १० हजारभन्दा कम भएको थियो । जनवरी २५ र २६ का दिनमा भारतमा २४ घण्टामा कोरोना भाइरस संक्रमित संख्या करिब नौ हजार एक सय भएको थियो ।

कोरोना संक्रमितको उक्त संख्या यसअघिका दुई सय ३७ दिनहरुका सबैभन्दा कम थियो । हालका केही दिनयता भारतमा कोरोना संक्रमित र सक्रमणबाट मृत्यु हुने व्यक्तिको सख्या बढ्न थालेको भारतीय सरकारी अधिकारीहरुले जानकारी दिएका छन् ।

गत २४ घण्टामा ७२ हजारभन्दा बढी व्यक्तिमा कोरोना संक्रमण देखिएपछि कुल संक्रमितको संख्या एक करोड २२ लाख २१ हजारभन्दा बढी पुगेको छ । कुल संक्रमितमध्ये पाँच लाख ८४ हजार पाँच सय ६६ जना अहिले पनि संक्रमित अवस्थामै रहेका छन् भने एक करोड १४ लाख ७४ हजारभन्दा बढी संक्रमणमुक्त भएका छन् । भारतमा जनवरी १६ बाट कोरोना भाइरसविरुद्धको खोप अभियान सुरु भएको थियो । सो समयदेखि हालसम्म छ करोड ५० लाखभन्दा बढीले खोप लगाइसकेका छन् ।

त्यसैगरी कोरोना परीक्षण गर्ने क्रम पनि चलिरहेको भारतीय चिकित्सा अनुसन्धान परिषद्ले जनाएको छ । परिषद्का अनुसार सोमबारसम्म भारतमा २४ करोड ४६ लाख हजारभन्दा बढी व्यक्तिको कोरोना परीक्षण गरिएको छ । बुधबार एकै दिनमा दश लाख भन्दा बढीको कोरोना परीक्षण गरिएको समाचारमा जनाइएको छ । (रासस/सिन्ह्वा)