नक्कली भ्याट बिल बनाएर राजस्व छली

काठमाडौं । राजस्व अनुसन्धान विभागले नक्कली तथा झुटा मूल्य अभिवृद्धि कर बिजक (भ्याट) जारी गरेर करोडौँ राजस्व छली गर्ने तीन जनाविरुद्ध मुद्दा दायर गरेको छ ।

विभागले भारतीय नागरिक धीरजकुमार जयसवाल, काठमाडौँ महानगरपालिका–३२ का सुमनकुमार श्रेष्ठ र वीरगञ्ज महानगरपालिका–४ का राहुलकुमार जयसवालविरुद्ध उच्च अदालत पाटनमा मुद्दा दायर गरिएको हो । उनीहरूविरुद्ध १० करोड ९३ लाख दुई हजार छ सय ७६ बराबरको जरिवाना र कैद सजायको मागदाबी गरिएको विभागले जनाएको छ । विभागले शुक्रबार उच्च अदालत पाटनमा मुद्दा दायर गरेको भए पनि आज सार्वजनिकरूपमा जानकारी दिएको हो ।

विभागका अनुसार उनीहरूले मूल्य अभिवृद्धि करतर्फ एक करोड ७१ लाख ३२ हजार एक सय ७० रूपैयाँ, आयकरतर्फ तीन करोड ७५ लाख १९ हजार एक सय ६८ रूपैयाँ गरी पाँच करोड ४६ लाख ५१ हजार तीन सय ३८ रूपैयाँ राजस्व छली गरेका थिए । विभागले बिगोको दोब्बरबराबरको सजायको मागदाबी गरेको हो । त्यसअनुसार आरोपीमाथि १० करोड ९३ लाख दुई हजार छ सय ७६ बराबरको सजायको माग गरेको छ ।