भूकम्पपीडित लाभग्राहीलाई भुक्तानी गर्न १६ करोड बढी रकम अपुग

सोलुखुम्बु । मापदण्डअनुसार निजी आवास निर्माण गरेका माथिल्लो सगरमाथाका तीन जिल्लाका भूकम्पपीडित लाभग्राहीलाई भुक्तानी गर्न १६ करोड ३१ लाख रूपैयाँ अपुग भएको छ । ओखलढुंगा, सोलुखुम्बु र खोटाङ जिल्लाका लाभग्राहीलाई भुक्तानी गर्न रकम अपुग भएको हो । सघन सहरी तथा भवन निर्माण आयोजना कार्यालय ओखलढुंगाले यी तीनै जिल्लाका लाभग्राहीलाई अनुदान रकम उपलब्ध गराउँदै आएको छ । सघन सहरी तथा भवन निर्माण विभागले लाभग्राहीलाई वितरण गर्न पर्याप्त बजेट नपठाएको भवन कार्यालयको भनाइ छ ।

कार्यालयका अनुसार ओखलढुंगामा २८ हजार ३३ लाभग्राहीमध्ये एक हजार एक सय पाँच जनाले पहिलो किस्ता, दुई हजार पाँच सय १० जनाले दोस्रो किस्ता र दुई हजार सय ९१ जनाले तेस्रो किस्ता अनुदान लिन बाँकी छ । सोलुखुम्बुमा १३ हजार नौ सय २६ जना लाभग्रागीमध्ये पाँच सय ९४ जनाले पहिलो किस्ता, एक हजार चार सय १८ जनाले दोस्रो किस्ता र एक हजार सात सय ४२ जनाले तेस्रो किस्ता लिएका छैनन् । यस्तै खोटाङ जिल्लामा रहेका १० हजार नौ सय ४४ लाभग्राहीमध्ये छ सय ४३ जनाले पहिलो किस्ता, एक हजार पाँच सय ४४ जनाले दोस्रो किस्ता र एक हजार दुई सय ८९ जनाले तेस्रो किस्ता लिन बाँकी छ ।