महासंघको टोली मकाउ प्रस्थान

काठमाडौं । चौधौं अन्तर्राष्ट्रिय पूर्वाधार लगानी तथा निर्माण मञ्चको सम्मेलनमा सहभागी हुन नेपाल निर्माण व्यवसायी महासंघको एक प्रतिनिधिमण्डल मकाउ प्रस्थान गरेको छ । प्रतिनिधिमण्डल निर्माण व्यवसायीहरू, भौतिक पूर्वाधार तथा यातायात मन्त्रालयका प्रतिनिधिसमेत गरी नौ सदस्यीय रहेको छ ।

महासंघ अध्यक्ष रवि सिंह नेतृत्वको प्रतिनिधिमण्डलले मकाउमा रहँदा अन्तर्राष्ट्रियस्तरमै निर्माण उद्योगमा देखापरेका समस्याहरू र समाधानका उपायसहितका छलफलमा सहभागिता जनाउनेछ । प्रतिनिधिमण्डल नेतृत्वकर्ताको हैसियतमा अध्यक्ष सिंहले सम्मेलनलाई सम्बोधनसमेत गर्नेछन् । यसपटकको सम्मेलनमा नारा ‘गोइङ ग्रिन, डिजिटल एन्ड स्मार्ट फाइनान्सिङ विनविन कोअपरेसन’ तय गरिएको छ ।

चीनका निर्माण व्यवसायीहरूको संगठन र मकाउ व्यापार तथा लगानी प्रवर्द्धन केन्द्रले संयुक्तरूपमा सम्मेलन आयोजना गरेका हुन् । तेह्रौंं संस्करणसम्म ७० देशका दुई हजारभन्दा बढी प्रतिनिधि सम्मेलनमा सहभागी भइसकेका छन् ।