एक महिनामा संघीय सरकारको कुल खर्च २२ अर्ब २६ करोड

काठमाडौं । एक महिनामा संघीय सरकारले कुल २२ अर्ब २६ करोड रुपैयाँ खर्च गरेको छ । महालेखा नियन्त्रकको कार्यालयका अनुसार आर्थिक वर्ष २०७९÷०८० को साउन मसान्तसम्म संघीय सरकारको कुल २२ अर्ब २६ करोड खर्च भएकोे हो । यस अवधिमा चालू खर्चतर्फ पाँच अर्ब ६६ करोड, पुँजीगत खर्चतर्फ एक अर्ब ४८ करोड र वित्तीय व्यवस्थाअन्तर्गतको खर्चतर्फ १५ अर्ब १२ करोड छ ।

महालेखाका अनुसार चालू आवको पहिलो महिनामा सरकारको कुल राजस्व ७९ अर्ब ७२ करोड रुपैयाँ परिचालन भएको छ । यसमा प्रदेश सरकार तथा स्थानीय तहमा बाँडफाँट हुने रकम समेत समावेश छ । यसमध्ये कर राजस्वतर्फ ७० अर्ब ६४ करोड र गैरकर राजस्वतर्फ नौ अर्ब आठ करोड रुपैयाँ परिचालन भएको छ । नगद मौज्दात २०७९ साउन मसान्तमा नेपाल राष्ट्र बैंकमा रहेका सरकारका विभिन्न खातामा दुई खर्ब ९४ अर्ब २५ करोड रुपैयाँ रहेको छ । यस्तो रकममा प्रदेश सरकार तथा स्थानीय तहको खातामा रहेको रकम समेत समावेश रहेको छ । २०७९ असार मसान्तमा यस्तो मौज्दात दुई खर्ब २७ अर्ब ६९ करोड रहेको थियो ।

महालेखाका अनुसार प्रदेश सरकारको स्रोतप्राप्ति १० अर्ब ८१ करोड रुपैयाँ छ । यसमध्ये संघीय सरकारले प्रदेश सरकारलाई हस्तान्तरण गरेको अनुदान र विभाज्य कोषबाट बाँडफाँट हुने राजस्वसमेत गरी चार अर्ब ९७ करोड छ र प्रदेश सरकारहरुले परिचालन गरेको राजस्व र अन्य स्रोतबाट पाँच अर्ब ८४ करोड छ । यसैगरी, यस अवधिमा प्रदेश सरकारहरुको खर्च २८ करोड रुपैयाँ छ ।