करिब चार अर्ब संकलन गरेको क्यापिटल सहकारीका व्यवस्थापक सम्पर्कविहीन !

काठमाडौं । काठमाडौंको क्षेत्रपाटीमा रहेको क्यापिटल बचत तथा ऋण सहकारी संस्था लिमिटेडका प्रमुख व्यवस्थापक दिनेश पौडेल बचतकर्ताहरुको करोडौँ रकम हिनामिना गरेर सम्पर्कविहीन भएका छन् ।

नेपालमा सञ्चालनमा आएका दर्जनौँ सहकारी संस्थाहरुका सञ्चालकहरु भाग्ने क्रम बढेकै समयमा क्यापिटल सहकारीमा प्रमुख व्यवस्थापक पौडेल समेत सम्पर्कविहीन बनेका हुन् ।

करिब ८० प्रतिशत औषधि व्यवसायीहरु सदस्य रहेको यस क्यापिटल सहकारीको आर्थिक दायरा झण्डै चार अर्ब रहेको बताइएको छ ।

नेपाल औषधि व्यवसायी संघका महासचिव समेत रहेका रामचन्द्र शर्मा अध्यक्ष, योगेश्वर सापकोटा उपाध्यक्ष, अच्युत बुढाथाकी सचिव र अशोक पाण्डे कोषाध्यक्ष रहेको यस सहकारीका प्रमुख व्यवस्थापक पौडेल सम्पर्कविहीन भएसँगै सहकारीले कोटा प्रणालीबाट भुक्तानी गर्दै आएको छ । बचतकर्ताहरुले आफूले भनेअनुसारको भुक्तानी नपाएको र सहकारीले आफ्नो अनुकूल हेरेर मात्र भुक्तानी दिइरहेकोले पीडितहरु ससंकित हुन थालेका छन् ।

सहकारीको गत साउन २८ गते बसेको सञ्चालक समितिले सेयर होल्डर र बचतकर्ताको भेला गरेर संस्थाको प्रमुख व्यवस्थापक बेपत्ता भएको र आवश्यकताभन्दा बढी बचत नझिक्न र संस्थाको कारोबार सुचारु राख्न अनुरोध गर्दै संस्थाको विषयमा यो वा त्यो चर्चा मिडियामा नगर्न भनेसँगै बचतकर्ताहरु थप आतंकित भएका छन् ।