जनचेतना साकोसको कुल पुँजी नौ करोड ४० लाख

दोलखा । जिल्लाको बैतेश्वर गाउँपालिका–४ देउरालीमा रहेको जनचेतना बचत तथा ऋण सहकारीले आफ्नो २३औँ वार्षिक साधारणसभा शनिबार सम्पन्न गरेको छ । संस्थाले २३औँ वर्षमा आइपुग्दा नौ करोड ४० रुपैयाँ पुँजी संकलन गर्न सफल भएको छ ।

सहकारीका अध्यक्ष मुक्ति दहालको अध्यक्षयता भएको साधारणसभामा कोषाध्यक्ष नवराज खड्काले नौ करोड ४० लाख रुपैयाँबराबरको आयव्यय प्रतिवेदन प्रस्तुत गरेका थिए । खड्काले प्रस्तुत गरेको आर्थिक वर्ष २०७९/०८० को प्रगति प्रतिवेदनअनुसार सहकारीको पुँजी तथा दायित्वतर्फ सेयर पुँजी ८७ लाख ६७ रुपैयाँ रहेको छ भने ऋण नोक्सानी कोष व्यवस्थातर्फ ६७ लाख ३९ हजार रुपैयाँ रहेको छ ।

त्यस्तै जगेडा कोषतर्फ ९२ लाख ६३ हजार रुपैयाँ र खुद नाफा २० लाख २६ हजार रुपैयाँ रहेको प्रतिवेदनमा उल्लेख छ । संस्था हाल दुई हजार दुई सय २० जना सेयर तथा बाल सदस्य आबद्ध रहेका छन् । संस्थाले आफ्नो २३औँ साधारणसभाको अवसरमा विभिन्न विधामा सदस्यहरूलाई सम्मान समेत गरेको थियो ।