मेधावी सहकारीले १५ प्रतिशत लाभांश वितरण गर्ने

काठमाडौं । मेधावी बचत तथा ऋण सहकारी संस्थाले सेयरधनीहरूलाई १५ प्रतिशत लाभांश वितरण गर्ने भएको छ । संस्थाको ९औँ साधारणसभाले लाभांश वितरण गर्ने निर्णय पारित गरेको हो ।

पूर्वअर्थमन्त्री डा. युवराज खतिवडाको प्रमुख आतिथ्यतामा सम्पन्न साधारणसभामा संस्थाका व्यवस्थापक हिरण्यराज उप्रेतीले संस्थाको आ.व ७९/८० को संस्थागत प्रतिवेदन प्रस्तुत गरेका थिए । सो आर्थिक वर्षमा संस्थाको वासलत १३ करोड ४८ लाख रूपैयाँ रहेको छ । यस्तै संस्थाको सेयर पुँजी एक करोड ३४ लाख रूपैयाँ, निक्षेप १० करोड ४३ लाख रूपैयाँ, कर्जा लगानी ११ करोड ४८ लाख रूपैयाँ र जगेडा कोष ४७ लाख १६ हजार रूपैयाँ रहेको व्यवस्थापक उप्रेतीले बताए । यसैगरी सभामा सहकरीका उत्कृष्ट सञ्चालक, उत्कृष्ट ऋणी, उत्कृष्ट बचतकर्ता, उत्कृष्ट ज्येष्ठ नागरिक तथा प्लस टु उत्कृष्ट छात्र/छात्रालाई सम्मान गरिएको थियो ।

सहकारीका अध्यक्ष डा. सुभाषकुमार घिमिरेले सहकारी क्षेत्र कठिन समयमा रहेको बेलमा पनि आफ्नो संस्थाले १५ प्रतिशत लाभांश दिनसक्नु सहकारीको विषेश र सबल पक्ष भएको बताए । कार्यक्रममा पूर्वअर्थमन्त्री खतिवडाले नेपालको बिरामी अर्थतन्त्रलाई पुँजी परिचालन तथा मौद्रिक नीतिमार्फत सहज गर्न सकिने बताएका थिए । संस्थाका अध्यक्ष घिमिरेको अध्यक्षतामा भएको साधारणसभामा बागमती प्रदेशका पूर्वसासंद नरोत्तम वैद्य, दोलखा जिल्लाका पूर्वजिल्ला विकास समितिका सभापति रुद्रबहादुर खड्का, चलचित्र विकास बोर्डका पूर्वअध्यक्ष रवीन्द्र खड्कालगायतको उपस्थिति थियो ।