महिला चेम्बरको सहकार्यमा चित्रकला प्रदर्शनी

काठमाडौं । सिद्धार्थ आर्ट ग्यालेरी बबरमहलमा चित्रकला प्रदर्शनी गरिएको छ । नेपाल चेम्बर अफ कमर्सअन्तर्गत गठित नेपाल महिला चेम्बरको सहकार्यमा प्रदर्शनी गरिएको आयोजकले जनाएको छ ।

महिला चेम्बरको सदस्य तथा कलाकार रिशिका जालानबाट सिर्जना गरिएको चित्रकला प्रदर्शनीको नेपाल महिला आयोगका सदस्य कृष्णकुमारी पौडेल खतिवडाले उद्घाटन गरेकी थिइन् । सो अवसरमा खतिवडाले चित्रकलाले मानवीय संवेग तथा सामाजिक रूपान्तरणको लागि सन्देश प्रवाहित गर्ने भएकाले यसको महत्व रहेको बताइन् । महिला आयोगले महिला कलाकारको क्षमता विकासका निमित्त विभिन्न कार्यक्रम सञ्चालन गरिरहेको पनि उनले जानकारी दिइन् ।

यस्तै, उनले रिशिका जालानद्वारा प्रदर्शित चौथो संस्करणको चित्रकला प्रदर्शनीको सफलताको कामना गरिन् । सो अवसरमा नेपाल महिला चेम्बरका महासचिव लिमा अधिकारी तथा कला प्रेमीहरूको उपस्थित रहेको थियो । शनिबारदेखि सुरु भएको प्रदर्शनी सोमबार सकिने बताइएको छ ।