विद्यार्थीलाई स्मार्ट बनाउने डिजी स्कुलको प्रयास

काठमाडौं । डिजी स्कूलले विधार्थीहरूलाई स्मार्ट सिटीको प्रविधिका बारेमा जानकारी दिने उद्देश्यले एक कार्यक्रमको आयोजना गरेको छ । पछिल्लो समय विश्वमा बढ्दै गएको स्मार्ट सिटीको प्रविधिका बारेमा जानकारी दिने उद्देश्यले कार्यक्रमको आयोजना गरिएको डिजी स्कुलका अध्यक्ष विज्ञान श्रेष्ठले जानकारी दिए ।

२१औँ शताब्दीको युगमा विद्यार्थीहरू हरेक हिसाबले आफ्नो दैनिकीमा समेत प्रविधिको प्रयोग गर्नुपर्ने हुँदा यस्तो कार्यक्रमको आयोजना गरिएको उनले बताए । बेलायत सरकार मातहत दर्ता भई विद्यालय र उच्च शिक्षासम्बन्धी पाठ्यक्रम निर्माण गर्ने एनसीसी एजुकेसनले तयार गरेको डिजी प्रोग्रामलाई नेपालमा ‘डिजी स्कुल’ नाम दिइएको हो । नेपालका स्कुले विद्यार्थीले पनि अन्तर्राष्ट्रियस्तरको कम्प्युटर शिक्षा पाउन भन्ने उद्देश्यले डिजी स्कुल नेपालमा ल्याएको हो । आईजीसीएसई (इन्टरनेसनल जनरल सर्टिफिकेट अफ सेकेण्डरी एजुकेसन)ले समेत ‘डिजी प्रोग्राम’ लाई मान्यता दिएको छ । कार्यक्रममा दशैँ एवं तिहारको अवसरमा आयोजित चंगा चेट प्रतियोगिताका विभिन्न विधामा प्रथम, द्वितीय, तृतीय र सान्त्वना हुनेलाई मेडल, ट्रफी, किबोर्ड, हेडफोन, कपलगायतका विभिन्न पुरस्कार समेत वितरण गरिएको थियो । सेप्टेम्बर १ देखि अक्टोवर ९ सम्म भएको प्रतियोगितामा काठमाडौं, पोखरा, बुटवल, विराटनगर, स्याङ्जा सहितका स्थानबाट ७५ विद्यार्थीहरू सहभागी रहेको आयोजक डिजी स्कुलले जनाएको छ ।