अप्ठ्यारोमा अमेरिकी चिप निर्माता कम्पनी

अमेरिका । मुख्य चिपनिर्माताहरु विडिया र एएमडीको सेयर ओरालो लागेको छ । चीनमा कृत्रिम बौद्धिक चिपहरुको बिक्रीमा प्रतिबन्धसम्बन्धी नयाँ नियमका कारण कम्पनीहरुको सेयरमा गिरावट आएको हो ।

अमेरिकी सरकारले चीन वा रुसमा चिपहरु सैन्य उपकरणमा प्रयोग नहोस् भनेर लाइसेन्स अनिवार्यको नियम ल्याएको हो । तर यसकै कारण दशौँ लाख अमेरिकी डलर आय घट्ने चिन्तामा कम्पनीहरु छन् । दुवै चिपनिर्माताको सेयर न्युयोर्क बजारमा घटेको छ ।

विडियाको सेयर ६.६ प्रतिशतले र एएमडीको ३.७ प्रतिशतले सेयर मूल्य घटेको छ । नयाँ विडियाका लागि ठूलो प्रहार भएको वेडबस सेक्युरिटिजका डाल इभ्सले बताए । चिनियाँ अधिकारीहरुले पछिल्लो नियमको कडा आलोचना गरेका छन् । चिनियाँ राज्यनियन्त्रित मिडियाका अनुसार अमेरिकी निर्णय समान प्रतिस्पर्धाको सिद्धान्तविपरीत छ भने यसले अन्तर्राष्ट्रिय आर्थिक र व्यापार नियमको उल्लंघन भएको छ ।

एक वक्तव्यमा बेइजिङले यस्ता गलत हर्कतहरु तत्काल रोक्नुपर्ने बताएको छ । यद्यपि अमेरिकाले यसलाई नीतिगत परिवर्तन नभएको बताएको छ । तर नयाँ लाइसेन्सको नियमले ए१०० र एच१०० चिपहरुको निर्यातमा असर गर्ने जनाएको छ । यसले ४० करोड डलरको चिनियाँ बिक्री प्रभावित हुनसक्ने विडियाको भनाइ छ । यता एएमडीका प्रवक्ताले नयाँ नियमसँगै एमआई२५० चिपहरुको चिनियाँ निर्यात प्रभावित हुने बताएको छ । यी दुवै कम्पनीले फेब्रुअरीमा रुसले युक्रेनविरुद्ध आक्रमण थालेपछि रुसमा बिक्री रोकिसकेका छन् ।