सिद्धार्थ बैंकद्वारा अस्पताल निर्माणको लागि रकम सहयोग

काठमाडौं ।
सिद्धार्थ बैंक लिमिटेडले विहीबार विराटनगरस्थित नागरिक केयर सेन्टरलाई सामाजिक उत्तरदायित्वअन्तर्गत पाँच लाख आर्थिक सहयोग प्रदान गरेको छ । सो रकम बैंकका प्रदेश प्रमुख कमल बस्नेतले नागरिक केयर सेन्टरका अध्यक्ष पवनकुमार शारदालाई हस्तान्तरण गरेका हुुन् ।

बैंकबाट प्राप्त रकम नागरिक केयर सेन्टरले प्रदेश नं. १ मा कोभिड–१९ संक्रमितहरूका उपचारका लागि आवश्यक सेवा सुविधायुक्त एक सय श्ययाको अस्पताल बनाउनका लागि उपयोग गर्नेछ । संक्रमितहरूलाई उपचारसम्मको पहुँचमा सहजीकरण गर्ने उद्देश्यले गठन गरिएको संस्था, नागरिक केयर सेन्टरलाई बैंकले पु-याएको यस सहयोगबाट संक्रमितहरूको उपचारमा केही हदसम्म भए पनि सहजता पुग्ने विश्वास बैंकले लिएको छ ।

बैंकले शिक्षा, स्वास्थ्य, वातावरण, पर्यटन, सांस्कृतिक सम्पदा, पूर्वधार र सुरक्षाजस्ता क्षेत्रअन्तर्गत विभिन्न सामाजिक उत्तरदायित्व निर्वाहसम्बन्धी कार्यहरूमा सहभागिता जनाउँदै आएको र आगामी दिनहरूमा पनि यसलाई निरन्तरता दिँदै जाने उद्देश्य रहेको बैंकले जानकारी दिएको छ ।