डेपुटी गभर्नर श्रेष्ठलाई सफाइ

काठमाडौं, माघ ३
नेपाल राष्ट्र बैंकका डेपुटी गभर्नर शिवराज श्रेष्ठले सफाइ पाएका छन् । आर्थिक अनियमितताको अभियोगमा निलम्बनमा परेका श्रेष्ठले मन्त्रिपरिषद्को निर्णयअनुसार सफाइ पाएका हुन् । ‘यसअघि श्रेष्ठ जुन अभियोगमा निलम्बनमा परेका थिए, सोहीअनुरुप अनियिमतता गरेको नभेटिएछि श्रेष्ठलाई सफाइ दिइएको हो’, सरकारका प्रवक्ता एवं सूचना तथा सञ्चार प्रविधिमन्त्री गोकुल बाँस्कोटाले भने । अनियमितताको आरोप लागेपछि श्रेष्ठ २०७६ कात्तिक १८ गतेदेखि निलम्बनमा परेका थिए । डेपुटी गभर्नर श्रेष्ठमाथि सम्पत्ति शुद्धीकरण अनुसन्धानमा असहयोग गरेको, विभिन्न बैंकहरुमा खराब कर्जा लुकाउन सहयोग गरेको लगायतका अभियोगहरु लगाइएको थियो । सोपश्चात् श्रेष्ठमाथि लागेको अभियोगका विषयमा छानबिन गर्नको लागि नेपाल राष्ट्र बैंकका सञ्चालक श्रीराम पौडेलको संयोजकत्वमा छानबिन समिति गठन गरिएको थियो ।