प्रत्यक्ष निर्वाचन प्रणालीतर्फको निर्वाचन कार्यक्रम स्वीकृत, असोज २३ गते उम्मेदवारी दर्ता

काठमाडौं । निर्वाचन आयोगले प्रतिनिधिसभा तथा प्रदेशसभा सदस्य निर्वाचनका लागि प्रत्यक्ष निर्वाचन प्रणलीतर्फको निर्वाचन कार्यक्रम स्वीकृत गरेको छ ।

आयोगले बिहीबार स्वीकृत गरेको निर्वाचन कार्यक्रमअनुसार असोज २३ गते उम्मेदवारको मनोनयनपत्र दर्ता गर्ने र मनोनयनपत्र दर्ता भएको उम्मेदवारको सूची प्रकाशन गर्ने, असोज २४ गते उम्मेदवारको विरोधमा उजुरी दिने, असोज २४ देखि २५ गतेसम्म मनोनयनपत्र र उजुरी उपर जाँचबुझ गरी निर्णय गर्ने, असोज २५ गते उम्मेदवारको नामावली प्रकाशन गर्ने र असोज २६ गते उम्मेदवारको नाम फिर्ता लिने, उम्मेदवारको अन्तिम नामावली प्रकाशन गर्ने एवं उम्मेदवारलाई निर्वाचन चिह्न प्रदान गर्नेगरी तोकिएको छ । यी सबै निर्वाचन कार्यक्रमहरू सम्बन्धित निर्वाचन अधिकृतको कार्यालयमा सञ्चालन हुने आयोगले जनाएको छ ।

यस्तै समानुपातिक निर्वाचन प्रणालीतर्फको बन्दसूचीमा नाम समावेश भएको व्यक्ति प्रत्यक्ष निर्वाचन प्रणालीतर्फको उम्मेदवार हुन नपाउने व्यवस्था रहेको आयोगले जनाएको छ ।