पुनः ११ अर्ब ८३ करोड रुपैयाँको ट्रेजरी

काठमाडौं । नेपाल राष्ट्र बैंकले आइतबार पुनः ११ अर्ब ८३ करोड रुपैयाँबराबरको ट्रेजरी बिक्री गरेको छ । राष्ट्र बैंकका अनुसार सो दिन अपराह्न ३ बजेसम्म उक्त परिमाणमा ट्रेजरी बिल बिक्री गरिएको हो । यसअघि यही भदौ २७ गते पनि राष्ट्र बैंकले १० अर्ब रुपैयाँबराबरको ट्रेजरी बिल बिक्री गरेको थियो । यसरी बिक्री गरिएको ट्रेजरी बिल पुरानो नवीकरण अन्तर्गतको हो ।

राष्ट्र बैंकका अनुसार जारी मिति असोज ४ गते मंगलबार तोकिएको ट्रेजरी खरिदको लागि वाणिज्य बैंक, विकास बैंक र फाइनान्स कम्पनीहरुले भाग लिएका थिए । बिक्री गरिएको कुुल ट्रेजरीमध्ये २८ दिने अवधिको दुई अर्ब, ९१ दिने अवधिको पाँच अर्ब ५३ करोड, एक सय ८२ दिने अवधिको चार अर्ब ३० करोड रुपैयाँबराबरको थियो । जसमध्ये २८ दिने ट्रेजरीको परिपक्व हुने अवधि २०७९ कात्तिक १ गते, ९१ दिने ट्रेजरीको परिपक्व हुने अवधि २०७९ पुस ५ गते र एक सय ८२ दिने ट्रेजरीको परिपक्व हुने अवधि २०७९ चैत ७ गते तोकिएको राष्ट्र बैंकले जनाएको छ ।

यसअघि गत साता पनि राष्ट्र बैंकले २८ दिने अवधिको दुई अर्ब र ९१ दिने अवधिको पाँच अर्ब रुपैयाँ बराबरको ट्रेजरी बिल जारी गरेको थियोे ।