बर्दगोरियामा असोज ३० गतेदेखि फुटबल प्रतियोगिता

कैलाली । कैलालीको बर्दगोरिया गाउँपालिकामा पाँचौँ बर्दगोरिया सेती लोकमार्ग खुला रास्ट्रव्यापी फुटबल प्रतियोगिता हुने भएको छ । मंगलबार पत्रकार सम्मेलन गरि पाँचौं बर्दगोरिया फुटबल प्रतियोगिता हुने जानकारी दिइएको हो ।

विगत चार संस्करण सफल रुपमा सम्पन्न गरेको सडकपुर बौनिया युवा क्लबले यसपटक यहि असोज ३० गते देखि कार्तिक ७ गते सम्म प्रतियोगिताको आयोजना गर्न लागेको हो । प्रतियोगितामा प्रथम हुने टिमले २ लाख २५ हजार नगद सहित ट्रफी, मेडल र प्रमाणपत्र प्राप्त गर्नेछ भने द्दितिय स्थान हासिल गर्ने टिमले नगद १ लाख १५ हजारसहित ट्रफी ,मेडल र प्रमाणपत्र प्राप्त गर्ने प्रतियोगिताका खेल संयोजक रवि कुँवरले जानकारी दिए । यसैगरि प्रतियोगिताको उत्कृष्ट खेलाडीले नगद १५ हजारसहित ट्रफी, मेडल र प्रमाणपत्र प्राप्त गर्दा उत्कृष्ट गोल रक्षक, उत्कृष्ट डिफेन्डर, सर्वाधिक गोलकर्ता र उदीयमान खेलाडीले नगद १०/१० हजारसहित मेडल, ट्रफी र प्रमाणपत्र प्राप्त गर्ने छन ।

प्रतियोगितामा तीन प्रदेशसहित विभागीय टिमलगायत १६ टिमको सहभागिता रहने क्लबका अध्यक्ष जीवन बीसीले बताए । प्रतियोगिताको कुल खर्च १२ लाख लाग्ने र प्रायोजकहरुको खोजी भइरहेको प्रतियोगिताका आर्थिक संयोजक पुष्प भण्डारीले बताए । यस क्षेत्रमा रहेको बर्दगोरिया धामको प्रचारप्रसारमा सहयोग पुगोस् भन्ने उद्देश्य प्रतियोगिताको आयोजना गरिएको क्लवका महासचिव तथा प्रतियोगिता प्रचारप्रसार संयोजक कृष्ण प्रसाद ओझाले जानकारी दिए । साथै रोकिएको सेती लोकमार्गको कामले पनि तीव्रता पाओस् भन्ने प्रतियोगिताको उद्देश्य छ ।