गहुँको आयात खुलाउन र स्टार्टअप कार्यविधि स्वीकृत गर्न महासंघको माग

काठमाडौं । नेपाल उद्योग वाणिज्य महासघले गहुँको आयात खुलाउन र स्टार्टअप कार्यविधि स्वीकृत गर्न सरकारसँग माग गरेको छ । महासंघको प्रतिनिधिमण्डलले सोमबार उद्योग, वाणिज्य तथा आपूर्तिमन्त्री दामोदर भण्डारीलाई भेटी भारतले रोकेको गहुँको आयात खुलाउन र स्टार्टअप कार्यविधि स्वीकृत गर्नका लागि पहल गर्न माग गरेको हो ।

महासंघका अध्यक्ष शेखर गोल्छाको नेतृत्वमा गएको प्रतिनिधिमण्डल र उद्योगमन्त्रीबीच भएको भेटवार्तामा उद्योग व्यवसाय प्रवद्र्धनका लागि सहजीकरण, अस्थिर ब्याजदरमा नियन्त्रण, गहुँको आयात र स्टार्टअप कार्यविधि स्वीकृतलगायतका विषयमा छलफल भएको थियो । अस्थिर ब्याजदरका कारण साना व्यवसायी पीडामा परेकाले यसको समाधानका लागि पहल गर्न उद्योगमन्त्रीमार्फत सरकारलाई आग्रह गरिएको भेटवार्तापछि महासंघले जारी गरेको प्रेस विज्ञप्तिमा उल्लेख छ । इन्धनको मूल्य समायोजन हुन नसक्दा वस्तुको उत्पादन लागत बढ्न गई मुद्रास्फीतिमा समेत चाप परेको, उद्योगहरूमा अघोषित विद्युत्भार कटौतीका कारण उत्पादन प्रभावित बनेको र बजारमा उधारोको समस्या विकराल बन्दै गएको अवस्थामा उधारो उठाउनेसम्बन्धी कानुन यथाशीघ्र ल्याउनुपर्ने माग महासंघले राखेको छ ।

यस्तै राष्ट्रिय आर्थिक रूपान्तरण नेट–२०३० कार्यान्वयनका लागि गत साउनमा महासंघ र सरकारबीच समझदारी भएकाले यसको प्रभावकारिताबारे पनि महासंघले चासो राखेको छ । त्यस्तै, महासंघको पहलमा सरकारले तयार भएको स्टार्टअप कार्यविधिमाथि अन्तिम छलफल गरी पारित गर्नसमेत उद्योगमन्त्रीसमक्ष महासंघले आग्रह गरेको छ । महासंघले प्रधानमन्त्रीको आसन्न भारत भ्रमणका क्रममा नयाँदिल्लीमा नेपाल–भारत लगानी सम्मेलन आयोजना गर्ने र त्यसमा भारतस्थित महासंघको साझेदार संस्था सीआईआई सहआयोजक रहने कार्यक्रम रहेकाले यसमा मन्त्रालयका तर्फबाट आवश्यक समन्वय गरिदिन समेत आग्रह गरेको छ । भेटमा उद्योगमन्त्री भण्डारीले स्टार्टअप कार्यविधि निर्माणको काम अन्तिम चरणमा पुगेको र छिटै पारित हुने प्रतिबद्धता जनाए । त्यस्तै, भारतले अहिले गहुँ आयात रोक्दा उत्पन्न समस्याबारे भारतसँग छलफल भइसकेकाले तत्काल आयात खुल्ने उद्योगमन्त्री भण्डारीले जानकारी दिएको महासंघले जनाएको छ ।