रातमा क्वारेन्टाइन, दिउँसो काफल खान जङ्गलमा

मदनराज भट्ट
बैतडी, जेठ २०
बैतडी जिल्लामा हाल पाँच हजारभन्दा बढी व्यक्तिहरू क्वारेन्टाइनमा बसिरहेका छन् । उनिहरूमध्ये धेरै व्यक्ति इमान्दार भए पनि केहीलाई सम्हाल्न भने निकै गा-हो भएको छ । गत बिहीबार पाटन–६ की एक महिला झाँक्री हुँ भन्दै क्वारेन्टाइनबाटै काम्दै गाउँ घुमिन्, ‘म सबैलाई बचाउछुँ भन्दै दैडिन्’, उनलाई नियन्त्रणमा लिई पुनः क्वारेन्टाइनमा राखियो । यो कुरालाई जिल्ला स्थित सरोकारवालाहरूले गम्भीररूपमा लिई यस्ता गतिविधि गर्नेलाई घरभन्दा टाढाको करेन्टाइनमा सरुवा गर्ने जिल्ला समन्वय समिति प्रमुख सिद्धराज भट्टले बताए ।

विभिन्न ठाउँका क्वारेटाइनमा बसेकाहरू दिनमा काफल खान जंगल जाने गरेको गुनासो आएको प्रमुख जिल्ला अधिकारी मोहनराज जोसी बताउछन् । ‘दिनभर घरपरिवारसँग बसेर काम गर्ने अनि साझपख परिवारसहित क्वारेन्टाइनमा बस्न जाने गुनासो आइरहेको छ’, प्रजिअ जोशीले भने । जुवातास खेल्ने जस्ता गतिविधिहरू क्वारेन्टाइनमा बसेकाहरूबाट भइरहेको समेत गुनासो आएको उनले बताए । ‘जबसम्म क्वारेन्टाइनको महत्व सबैले बुझ्दैनन्, लकडाउन के हो ? कसका लागि किन गरिएको हो ? यो कुरा बुझ्दैनन् तबसम्म समस्याहरू आउँछ,’ जोशीले भने । क्वारेन्टाइनमा बसेकामध्ये कतिपयले सारेकारवालाहरूको कुरा नसुन्ने गरेको दशरथचन्द नगरपालिकाका निमित्त प्रमुख प्रशासकीय अधिकृत बिक्रमबहादुर चन्दले बताए ।

‘विदेशबाट आएका दाजुभाइहरूलाई कोरोना भाइरसको त्रास महसुस नभएको देखिन्छ । धेरै व्यक्तिहरू क्वारेन्टाइनमा जुवातास खेलेर दिन बिताइरहेका छन् । सामाजिक दूरीको कुनै मतलब गरिएको छैन्, यसबारे जनचेतना फैलाउनु जरुरी छ’, उनले भने । कतिपय ठाउँमा वडा अध्यक्षको पार्टीभन्दा फरक पार्टीका व्यक्तिले उक्साइदिने गरेको दशरथचन्द नगरपालिकाका उपप्रमुख मिना चन्दले बताइन् । ‘अर्को क्वारेन्टाइनमा भत्ता बाढ्दै छन्, राम्रो खानेकुरा दिएका छन्, मासुभात खुवाउने गरेका छन् भनेर उक्साइदिन्छन्’, उनले भनिन् । बैतडी जिल्लालाई रेडजोनमा राखी सतर्कता अपनाइए पनि स्थानीयवासीको लापरबाहीका कारण कोरोना भाइरसको अति उच्च जोखिम रहेको छ ।